فتَّحت عيني على صوت أمي
ياللا بقى إصحى يا أحمد
عالمدرسة أوعى حتتأخر
بالعلم أكيد حاتكون أسعد
وأبوك أهه واقف يدعي
يكرمك يا أحمد ومحمد
وأخوك ده طول ليله مانَمشي
قلقان وعينه مابتغمض
أخدته وف حضني رقيته
وقلبه بصوت عالي بينبض
قوم يالَّا بقى على مدرستك
ومعاك أخوك وجارك مسعد
مسكت كراستي بإيدي
وجريت على أمي وأبويا
حاتوحشوني.... أنا متأكد
ودخلت أتوبيس مدرستي
سلِّمت على كل أصحابي
وأخويا واقف متردد
أقعد هنا جنبي يا أخويا
ده طريقنا سهل ومتحدِّد
طلِّيت من الشباك طلَّه
والنسمة حلوة وبتهدهد
رفعت للشمس عنيا
وشعاعها لسة وليد أبيض
سمعت صرخة من أخويا
والدنيا دارت حواليا
ولونها النَّاصع بقى أسود
ومسكني أخويا وف حضنه
غمَّضنا للدنيا عيوننا
وللشهادة بنردد
فتَّحت ع الجنة عيوني
وصوت ملايكة بتهني
وملايكة للمولى بتسجد
وصفوف من الشهدا شايفها
وهي واقفة بتغرَّد
أهلاً يا أحمد ومحمد
المجد لله سبحانه
وطوبى لكل من استشهد
ليست هناك تعليقات:
إرسال تعليق